كتيب الزم حدودك دليل المواطن لمعرفة حقوقه تجاه رجال الشرطه

                   

                    ألزم حدودك

دليل المواطن لمعرفة حقوقه تجاه رجال الشرطة

نظرا للمعاملة السيئة التي بتعاملها المواطن المصري من أفراد الشرطة وضاع بسبهها الكثير من الحقوق بل والحياة أيضا بالاضافه إلي عدم معرفة الكثير منا بحقوقه تجاه رجال الشرطة وكيفية اتخاذ إجراءات قانونيه وطرق أخري من اجل

أولا الحفاظ علي حياتنا وسلامتنا من الاذي

ثانيا الحفاظ علي حقوقنا القانونية

ولذلك فكرت إني اجمع حقوق المواطن ووسائل الحفاظ عليها ووضعها في كتيب صغير استكمالا لما بدأه العقيد عمر عفيفي في توضيح حقوق المواطن و الحفاظ عليها

إهداء إلي كل واحد فقد حياته أو كرامته داخل قسم شرطه أو داخل سجن

خالد سعيد _ السيد بلال _ عصام عطا

بعض المفاهيم والمصطلحات

يعني إيه تلبس : يعني رجل الشرطة يقبض عليك وأنت بتعمل جريمة سواء كنت بتتاجر في المخدرات أو بتسرق أو بتحاول تقتل حد أو أثناء مشاجرة  ، وحالة التلبس بتمدد لبعد الفعل يعني لو حضرتك ضربت واحد وساح في دمه ورجل الشرطة حضر بعد ما خلصت ضرب ولقاك واقف جنبه كده أنت في حالة تلبس حتى لو أنت سرقت وجريت والناس فضلت تجري وراك وانقبض عليك كده أنت في حالة تلبس

نص المادة

مادة [30]

تكون الجريمة متلبسا بها حال ارتكابها أو عقب ارتكابها ببرهة يسيرة.وتعتبر الجريمة متلبسا بها إذا اتبع المجني عليه مرتكبها أو تبعته العامة مع الصياح أثر وقوعها ، أو إذا وجد مرتكبها بعد وقوعها بوقت قريب حاملا آلات أو أسلحة أو أمتعة أو أوراقا أو أشياء أخرى يستدل منها على أنه فاعل أو شريك فيها ، أو إذا وجدت به في هذا الوقت آثار أو علامات تفيد ذلك

يعني إيه استيقاف : يعني رجل الشرطة يطلب منك أن تتوقف في مكانك ومتتحركش إطلاقا وده بيكون لما حضرتك بتضع نفسك في موقف شك وريبه يعني مثلا لو أنت بتلعب في قفل محل بالليل لو معاك كيس اسود وواقف تتلفت حواليك وفي هذه الحالة من حق ضابط الشرطة أن يطلب منك عدم التحرك ويشوف تحقيق الشخصية بتاعك ويتصل بقسم الشرطة ويسألهم إذا كان عليك أحكام أو مطلوب للعدالة أو يطلب منهم أنهم يطلعه إذن نيابة عشان يفتشك

القاعدة الاساسيه

بعد توقف العمل بقانون الطوارئ وكذلك قانون البلطجة أصبح ليس من حق رجل الشرطة تفتيش الأشخاص أو المنازل أو السيارات إلا بإذن من النيابة ويجوز لهم التفتيش في حاله واحده بدون أذن نيابة وهي حالة التلبس ولكن غير ذلك ليس من حقهم التفتيش ، ومن حقك رفض أي إجراء غير قانوني

مادة [40] (2) لا يجوز القبض على أي إنسان أو حبسه إلا بأمر من السلطات المختصة بذلك قانوناً ، كما تجب معاملته بما يحفظ عليه كرامة الإنسان ولا يجوز إيذاؤه بدنياً أو معنوياً.

أزاي أجيب حقي

طبعا أنت لو رفض التفتيش حتتاخد علي القسم وحيتعملك محضر وحيبقي عندك قضيه وفي الأغلب حتكون حيازة مخدرات وحتفضل محبوس علي ذمة تحقيق وبهدله

طبعا أنت خوفت من كل الكلام اللي أنا قلته عموما متخفش الحق اللي ورآه مطالبه عمره ما يضيع

أولا : تكلم أي حد من اهلك وتخليه يجيب محامي ويجيلك علي القسم علي طول وأنت ترفض تمضي علي المحضر لحد ما المحامي يوصل ، وبعد كده تخلي اهلك يبعته شكوى لوكيل النيابة اللي في المنطقة التابع ليها القسم

مادة [42] (1) لكل من أعضاء النيابة العامة ورؤساء ووكلاء المحاكم الابتدائية والاستئنافية زيادة السجون العامة والمركزية الموجودة في دوائر اختصاصهم .والتأكد من عدم وجود محبوس بصفة غير قانونية . ولهم أن يطلعوا على دفاتر السجن وعلى أوامر القبض والحبس وأن يأخذوا صورا منها وأن يتصلوا بأي محبوس ويسمعوا منه أي شكوى يريد أن يبديها لهم ، وعلى مدير وموظفي السجون أن يقدموا لهم كل مساعدة لحصولهم على المعلومات التي يطلبونها.

مادة [43] (2) لكل مسجون الحق فى أن يقدم فى أي وقت لمأمور السجن شكوى كتابيو أو شفاهية ، ويطلب منه تبليغها للنيابة العامة وعلى المأمور قبولها وتبليغها فى الحال بعد إثباتها فى سجل يعد لذلك فى السجن.ولكل من علم بوجود محبوس بصفة غير قانونية ، أو فى محل غير مخصص للحبس أن يخطر أحد أعضاء النيابة العامة – وعليه بمجرد علمه أن ينتقل فوراً إلى المحل الموجود به المحبوس وأن يقوم بإجراء التحقيق وأن بأمر بالإفراج عن المحبوس بصفة غير قانونية وعليه أن يحرر محضر بذلك.

 وتخلي اهلك يتصلوا بكل حد تعرفه ويحكوله اللي حصل وخصوصا الصحفيين والمدونين والنشطاء السياسيين ودول حتلاقيهم علي الفيس بوك وتويتر عشان يبقه متابعين

ثانيا : لو حد في القسم اعتدي عليك تعمل إضراب عن الأكل والشرب لحد ما يغمي عليك وتروح المستشفي وفي المستشفي بيعملو تقرير عشان يثبتوا إيه اللي فيك وحيكتبه في التقرير أثار الاعتداء عليك ، وبالمناسبة قاعدة المستشفي احسم من القسم ألف مره ، وأما تروح النيابة تقرير المستشفي وان في اعتداء عليك حيفيدك قوي

ثالثا : متنساش أهم حاجه وأنت داخل علي أي لجنه أو في أي تعامل بينك وبين حد من رجال الشرطة ابقي شغل الكاميرا بتاعت التليفون وخلي التليفون في أيدك متبينلوش انك بتصور ، لو شتمك أو أهانك امسك أعصابك وخد التسجيل و واطلع علي النيابة اعمل شكوى في الضابط و قدم التسجيل ، إنما لو راجل الشرطة اعتدي عليك فقانونا أنت ليك الحق انك تدافع دفاع شرعي علي نفسك بمقدار الاذي اللي أنت بتتعرضله ، ولو ضربت رجل الشرطة روح واعمل محضر واثبت فيه كل اللي حصل عشان هو كمان حيعملك محضر تعدي علي سلطات

أولا الكمين

طبعا زى ما أحنا عارفين أن الكماين في مصر نوعين نوع ثابت وده اللي بيبقي في طرق السفر والنوع الثاني كمين عادي وده اللي ضابط بيعمله في المكان اللي هو عايزه والمعروف باسم اللجنة

وفي الكمين الوضع بيختلف أذا كنت راكب عربيه ملاكي أو عربيه أجره

في العربية الملاكي : للضابط انو يسألك عن تحقيق الشخصية والرخص فقط ومش من حقه انو يفتش العربية ألا في حالة التلبس

أما العربيات الاجره : فمن حقه انو يفتش العربية ، يعني يفتش في الكراسي وتحتها لكن مش من حقه انو يفتش الشنط الخاصة بيك إلا في حالة التلبس أيضا

طب لو الضابط طلب مني أن افتح شنطة العربية وأنا في عربيه ملاكي ؟

بكل برود تسأله علي أذن من النيابة بتفتيش العربية

طبعا حيقل أدبه وحيقلك انك حتلبس تهمه وحيقول كلام كنير ، انتظر لحد ما يخلص كلامه وبعد ما يخلص اسأله تاني فين أذن النيابة

طبعا الضابط حستخدم معاك القوه وحياخدك علي البوكس ومنه علي القسم ، طبعا مش حوصيك تتصل بكل اللي تعرفهم وتعرفهم أنت في قسم أيه ، الضابط في الأغلب حيعملك محضر ده لو عمل أصلا وحيكون حيازة مخدرات متضمضيش علي  المحضر إلا بعد ما يعتدوا عليك عشان تمضي وأما يرحلوك علي النيابة احكي لوكيل النيابة الحكاية كلها وأثار الاعتداء علي جسمك حتاكد كلامك

ثانيا الحملة

أوقات كتير بيطلع ضابط ومعاه مجموعه من أمناء الشرطة ويدخلوا القهاوي أو الأماكن العامة أو حتى في الشارع ويفتشه الناس وياخدوهم علي القسم

زى ما قلنا قبل كده لو أنا في موقف سليم وتمام يبقي مش من حق راجل الشرطة غير انو يشوف تحقيق الشخصية بس ( البطاقة ) غير كده ملوش أي حاجه عندي يعني مينفعش يفتشني ولا ياخدني علي القسم  ، ومن حقك انك تسأله علي تحقيق الشخصية بتاعه (يعني أي ورقه بتثبت انه فعلا ضابط ) عشان ممكن يكون نصاب

مادة [24 مكررا ] (1) على مأموري الضبط القضائي ومرءوسيهم ورجال السلطة العامة أن يبرزوا ما يثبت شخصياتهم وصفاتهم عند مباشرة أي عمل أو إجراء منصوص عليه قانوناً ، ولا يترتب على مخالفة هذا الواجب بطلان العمل أو الإجراء ، وذلك دون إخلال بتوقيع الجزاء التأديبي.

طب لو حاول يفتشني ؟

ارفض تماما وابعد أيده عنك وأنت بتكلم معاه علي صوتك عشان الناس تتلم ويبقي في شهود علي اللي بيحصل ولو أخدك علي القسم وعملك أي محضر وفي الأغلب حيكون حيازة مخدرات متخفش فيه ناس في الشارع شاهدين علي الواقعة كلها وشاهدين أن محدش فتشك ومفيش مخدرات معاك ،  وتخلي اهلك يعمله محضر للضابط باللي حصل ويبعته شكوى لوكيل النيابة اللي في المنطقة ، ويا سلام لو الضابط اعتدي عليك بالضرب عشان تعمله محضر تاني

واهم حاجه بعد ما المحضر بتاع المخدرات اللي الضابط عملهولك يتحفظ في النيابة أوعي تخاف تفضل شغال محاضر وشكاوي في الضابط كل يوم تروح النيابة تقولهم علي اللي حصل لحد ما حقك يجيلك ، لو الضابط هدتك اعمله محضر تهديد وعدم تعرض

بالمناسبة مترحش القسم اللي فيه الضابط عشان تعمله محضر عشان حيعتدوا عليك ، خد بعضك وعلي النيابة علي طول

في تفتيش النساء

لا يجوز بأي حال من الأحوال أن يقوم رجل بتفتيش أنثي ، وأي تفتيش يقع من رجل علي أنثي يكون باطلا بالاضافه انه يعتبر جريمة تحرش بانثي ويعاقب عليها القانون

مادة [46]

فى الأحوال التي يجوز فيها القبض قانوناً على المتهم يجوز لمأمور الضبط القضائي أن يفتشه.وإذا كان المتهم أنثى وجب أن يكون التفتيش بمعرفة أنثى يندبها لذلك مأمور الضبط القضائي.

تفتيش الشقق

بعد إيقاف العمل بقانون الطوارئ أصبح مش من حق رجل الشرطة دخول البيوت إلا بإذن من النيابة إلا في حاله واحده وهي الاستغاثة ودي نادر لما بتحصل ، وفي وقتنا الحالي عشان الضابط يفتش منزلك أو عربيتك أو أي حاجه تخصك لازم يكون معاه أذن من النيابة

مادة [45] لا يجوز لرجال السلطة الدخول فى أي محل مسكون إلا فى الأحوال المبينة فى القانون ، أو فى حالة طلب المساعدة من الداخل أو فى حالة الحريق أو الغرق أو ما شابه ذلك.

لازم وأنت بتقرا الأذن تتأكد من حاجتين

أولا :  البيانات يعني فعلا هما طلبينك أنت عايزين يفتشه منزلك أنت مش منزل آخر

ثانيا : سبب التفتيش يعني هما بيدوروا علي سلاح ولا مخدرات ولا حد هارب

والنقطة الثانية مهمة جدا لان ضابط الشرطة لو بيفتش علي متهم هارب مش من حقه انو يفتش في الأدراج ولا بين الكتب والمستندات لأنه استحالة شخص يختبئ داخل درج (لو الضابط وجد مخدرات داخل احد الأدراج وهو قادم للبحث عن متهم القضية بتبوظ والمتهم بيطلع براءة بس ده مش معناه أن الضابط لو لقي مخدرات يسبها لا لان القانون مديله الحق انه لو وجد أي حاجه تعتبر جريمة ويعاقب عليها القانون انه يحرزها )

مادة [50] لا يجوز التفتيش إلا للبحث عن الأشياء الخاصة بالجريمة الجاري جمع الاستدلالات أو حصول التحقيق بشأنها.ومع ذلك إذا ظهر عرضا أثناء التفتيش وجود أشياء تعد حيازتها جريمة أو تفيد فى كشف الحقيقة فى جريمة أخرى ، جاز لمأمور الضبط القضائي أن يضبطها.

وأول ما تلاقي ضابط عايز يفتش منزلك أتكلم معاه بصوت عالي وحاول تلم اهلك وجيرانك ويكون أحسن لو خليت مع كل رجل شرطه حد من اهلك عشان تتضمن أن محدش يحط حاجه كده أو كده وهما بيفتشه

مادة [51] يحصل التفتيش بحضور المتهم أو من ينيبه عنه كلما أمكن ذلك ، وألا فيجب أن يكون بحضور شاهدين ، ويكون هذان الشاهدان بقدر الامكان من أقاربه البالغين أو من القاطنين معه بالمنزل أو من الجيران ، ويثبت ذلك فى المحضر.

 ولو الضابط معهوش أذن نيابة وأنت وسط واهلك وجيرانك اشتبك مع الضابط ومع القوه اللي معاه وأمنعه بالعافية ومتخفش مش حيعرف يعملك قضية مقاومة سلطات لأنه أصلا مكنش معاه أذن نيابة وما بني علي باطل فهم باطل

وخلي بالك أي اتلافات من رجال الشرطة في غير محلها ارفع عليهم قضية وطالبهم بالتعويض

طب إيه هي الاتلافات اللي في محلها ؟

مثلا انه يقطع مراتب السرير عشان يدور علي مخدرات

أنما لو وهو بيفتش كسرلك طقم صيني وقع التلفزيون كسروا ، عليك وعلي النيابة علي طول

كيفية التعامل مع رجل الشرطة

الضابط اسمه حضرتك واحذر انك تقلو يا باشا عشان باشا دي بتاعت السوابق والمسجلين وأمناء الشرطة وأنت أكيد مش منهم

ولو قلتله يا باشا حيتكبر عليك ، يعني بداية من اصغر عسكري لحد وزير الداخلية لما تحب تكلمه تقله حضرتك

مها تكون رتبة الشخص اللي قدامك متخلهوش يتكلم معاك بقلة أدب أو تكبر وتعالي ، يعني لو شتمك ( وأنت مش مسجل اللي بيحصل بالتليفون زى ما قلنا قبل كده ) رد عليه وقله اهو أنت ولو أنت بتسجل الكلام علي تليفونك ،  امسك أعصابك وروح اشتكيه بالتسجيل اللي معاك

ولو أنت شاب متخليش الضابط يقولك( يا ابني  أو ياض) ولو قالك كده قوله معاك الدكتور فلان الفلاني أو المهندس فلان الفلاني أو الأستاذ فلان الفلاني خلي دايما ردك جاهز

الضابط كل ما بيلاقيك عارف حقوقك وواثق من نفسك ومستبيع علي حياتك ورافض الظلم حيعمل حساب للمستقبل يعني لو أخدك علي السم مش حيعملك محضر  ولا يلبسك قضيه عشان حيخاف انك بعد كده تشتكيه عشان كله ده بيجي علي رأسه في الأخر وبيأخر الترقية بناعته وحيخلي الضباط اللي معاه في القسم يقنعوك بالتصالح

البطاقة

البطاقة الشخصية جزء من جسمك يعني متنزلش الشارع إلا وهي معاك حتى لو حتشتري حاجه من تحت البيت لان ضابط الشرطة لو سالك علي البطاقة وملقهاش معاك حيكون من حقه انو ياخدك علي القسم عشان يتحري علي شخصيتك .

طيب لو أنا معايا البطاقة الشخصية أو أي أثبات شخصيه ( جواز السفر مثلا ) بتديها للضابط وهو بيشوف أذا كان حيتصل بقسم الشرطة عشان يشوف عليك أحكام أو لا ، لو كان عليك أحكام بيتحفظ عليك لو معلكش أحكام بيسيبك تروح ، لو كان عليك أحكام فمن حقه انه يفتشك ، لو معلكش أحكام مش من حقه انه يفتشك ، ومفيش حاجه اسمها محضر تحري أو اشتباه طول ما أنت معاك البطاقة الشخصية

حالات القبض

ما هي الحالات اللي من حق رجل الشرطة انه يقبض عليا فيها ؟

أولا : أن يكون عليه أحكام

يعني لما بيكون صادر ضد الشخص أحكام غيابية أو أحكام حضوريه والمتهم هرب بعد كده ، وفي الحالات دي بيكون من حق رجل الشرطة انه يقبض علي المتهم في أي وقت يشوفه فيه، وبيتم تفتيشه بدون أذن نيابة

ثانيا : حالة التلبس

ودي لما رجل الشرطة يجد الشخص في حالة تلبس يعني أثناء قيامه بأي عمل مخالف للقانون مثلا بيبيع أو بيشتري أي نوع من أنواع المخدرات ، أو بيتخانق مع حد أو صدم حد بعربيته وفي الحالات دي يحق لرجل الشرطة التحفظ عليك وتفتيشك بدون أذن من النيابة

ثالثا : أذن النيابة

وهي الحالات اللي بيكون صادر أذن من النيابة بضبط وإحضار شخص ما ، فضابط الشرطة بيقوم بالقبض عليه وتفتيشه

رابعا : التواجد في أماكن مشبوهة تم إصدار أذن من النيابة بمداهمتها

وهي أن شخص يكون موجود في مكان يدير أعمال منافية للقانون مثل شقق الدعارة ، وبيتم إصدار أذن من النيابة بمداهمة المكان ويتم القبض علي كل المتواجدين

مادة [32]

لمأمور الضبط القضائي عند بانتقاله في حالة التلبس بالجرائم أن يمنع الحاضرين من مبارحة محل الواقعة أو الابتعاد عنه حتى يتم تحرير المحضر ، وله أن يستحضر في الحال من يمكن الحصول منه على إيضاحات في شأن الواقعة.

أزاي تعمل رأي عام لصالحك أذا تعرض لأي انتهاك لحقوقك؟

لو تم تعذيبك في احد أقسام الشرطة أو أهانتك علي يد فرد أو مجموعة أفراد من جهاز الداخلية ، بعد ما تاخد الإجراءات القانونية اللي وضحناها قبل كده حيبقي قدامك حاجه تعملها عشان تخلي قضيتك قضية رأي عام والمسؤوليين يتحركوا عشان يجبولك حقك

أنت أكيد عندك أكونت علي الفيس بوك ، حتجيب الملاحظات وتعمل ملاحظه تكتب فيها كل اللي حصل ولو في علي جسمك أثار تعذيب صورها بتليفونك و أنشرهم مع الملاحظة ، وبعد كده خد اللينك بتاع الملاحظة وابعته لكل الصفحات الاخباريه والثورية علي الفيس بوك ، وكمان أبعته لكل النشطاء علي تويتر ، وإنشاء الله حيوقفوا معاك

واللي معندوش pdf يحملها ward من هنا
http://www.4shared.com/office/BKQbz5TG/__online.html